Krummakot

 Föstudaginn 17. febrúar bjóða leikskólabörnin foreldrum sínum í heimsókn í leikskólann á tímabilinu 14:00-16:00. Foreldrum er velkomið að koma einhvern tíma á því tímabili og setjast niður í matsalnum með barni sínu. Boðið verður upp á niðurskorið grænmeti, kaffi, mjólk og vatn.

Foreldrar eru vinsamlegast beðnir um að fylla út foreldrakönnun meðan þeir dvelja í leikskólanum en hún er hluti af okkar innra mati og skiptir máli í allri framþróun leikskólastarfsins.

Miðvikudaginn 22. febrúar er öskudagur. Þann dag er fullur leikskóladagur og börnin eru hvött til að mæta í búningi í leikskólann. Þau geta fengið andlitsmálningu í leikskólanum ef þess er óskað. Þennan dag fara börnin á milli deilda og syngja hvert fyrir annað. Slegið er upp öskudagsballi í matsalnum og kötturinn (popp) sleginn úr tunnunni. Boðið er upp á popp, saltstangir og rúsínur aukalega þennan dag.

Ákveðið hefur verið að bjóða upp á foreldranámskeið um Jákvæðan aga. Námskeiðið verður opið foreldrum barna í Naustaskóla, Naustatjörn, Glerárskóla og Hrafnagilsskóla og mun kosta 1.500 kr. pr. þátttakanda. Námskeiðið verður haldið í Naustaskóla þrjú síðdegi frá kl. 17-19, þ.e. miðvikudaginn 29. febrúar, þriðjudaginn 6. mars og þriðjudaginn 13. mars. (Þetta er að hluta til upprifjun og endurtekning á námskeiði sem haldið var síðastliðinn vetur, kynning á stefnunni, ýmis gagnleg ráð fyrir uppalendur og tækifæri til að skiptast á ráðum varðandi uppeldi barnanna okkar.  Síðan er ætlunin að bjóða upp á ítarlegra 7 vikna námskeið næsta haust.)   Áhugasamir um þriggja kvölda námskeið framangreinda daga eru beðnir um að skrá sig með því að smella á vefslóðina hér fyrir neðan og fylla út reitina sem þá birtast. Haft verður samband við þátttakendur með tölvupósti þegar nær dregur, áhugasamir vinsamlegast skrái sig fyrir 10. febrúar. 

http://www.surveymonkey.com/s/LLPQMWN

Starfsfólk Krummakots sendir ykkur bestu óskir um gleði og farsæld á nýju ári með kæru þakklæti fyrir samveru og samstarf á árinu sem er að líða.
Við minnum á að mánudaginn 2. janúar er starfsdagur í leikskólanum. Þann dag mæta engin börn í leikskólann en leikskólinn opnar þriðjudaginn 3. janúar.

Föstudaginn 25. nóvember bjóða börnin í leikskólanum foreldrum í foreldrakaffi á tímabilinu 14 – 16. Foreldrum er velkomið að koma hvenær sem er á þessum tíma. Á boðstólnum verður kaffi, mjólk og piparkökur sem börnin hafa tekið þátt í að baka. Hugmyndin með foreldrakaffinu er að foreldrar gefi sér tíma til að setjast niður með barni sínu í leikskólanum og eiga notalega stund.

Í dag fékk Hrafnagilsskóli leik- og grunnskóladeild, grænfánann sem er viðurkenning fyrir góða vinnu í umhverfismálum. Grænfánaskólar eru alþjóðlegt verkefni til að auka umhverfismennt og styrkja umhverfisstefnu í skólum. Þegar vissu  takmarki er náð fá skólarnir leyfi til að flagga Grænfánanum næstu tvö ár en sú viðurkenning fæst endurnýjuð ef skólarnir halda áfram góðu starfi. Grænfáninn er umhverfismerki sem nýtur virðingar víða í Evrópu sem tákn um árangursríka fræðslu og umhverfisstefnu í skólum.

Markmið verkefnisins er að:
• Bæta umhverfi skólans, minnka úrgang og notkun á vatni og orku.
• Efla samfélagskennd innan skólans.
• Auka umhverfisvitund með menntun og verkefnum innan kennslustofu og utan.
• Styrkja lýðræðisleg vinnubrögð við stjórnun skólans þegar teknar eru ákvarðanir sem varða nemendur.
• Veita nemendum menntun og færni til að takast á við umhverfismál.
• Efla alþjóðlega samkennd og tungumálakunnáttu.
• Tengja skólann við samfélag sitt, fyrirtæki og almenning.

Landvernd
Grænfánaverkefninu á Íslandi er stýrt af Landvernd sem er aðili að alþjóðlegu samtökunum FEE.

Hér má sjá myndir frá afhendingu grænfánans í leikskólanum.

 Á morgun miðvikudaginn 16. nóvember er dagur íslenskrar tungu. Þá er hátíð hjá okkur í leikskólanum. Klukkan ellefu fáum við grænfánann en það er viðurkenning fyrir gott starf í umhverfismálum.

Við hvetjum alla til að mæta í grænum fötum á morgun eða með eitthvað grænt (buff, skart eða annað slíkt).

Þegar grænfáninn verður dreginn að húni er foreldrum velkomið að koma og vera viðstaddir athöfnina.

Í dag fóru leikskólabörn ásamt nemendum í 1. og 2. bekk grunnskóladeildarinnar á leiksýninguna Gilitrutt sem Brúðuheimar setja upp. Sýningin var í Laugarborg og höfðu allir gaman að, bæði stórir og smáir. Börnin stóðu sig mjög vel, sátu áhugasöm og stillt allan tímann. Hér má sjá myndir frá sýningunni.

Í leikskólanum er bangsavika 24. – 28. október. Þá mega leikskólabörn koma með bangsa og bangsabækur í leikskólann og hafa í leikskólanum út vikuna.

Lesa meira