Krummakot

Krummdagur 24. maí

leikskoli — Sun, 29 Apr 2012 21:15:48 +0000

Vorhátíð leikskólans, Krummadagur, verður fimmtudaginn 24. maí klukkan 14:00-16:00. Byrjað verður á sýningu í Laugarborg þar sem börn sýna atriði frá hverri deild. Einnig verða söngatriði og sameiginlegur dans. Eftir sýninguna fara allir í leikskólann þar sem við höldum áfram með hátíðina úti á leikskólalóðinni og inni. Foreldrafélagið býður upp á veitingar og listaverk barnanna verða til sýnis í leikskólanum. Vinsamlegast takið daginn frá og njótið hátíðarinnar með börnum ykkar. Allir velkomnir

Sumardagurinn fyrsti og starfsdagur

leikskoli — Wed, 18 Apr 2012 08:52:35 +0000

Um leið og við þökkum foreldrum, börnum og öðrum aðstandendum fyrir veturinn óskum við ykkur gleðilegs sumars.
Við minnum á að fimmtudaginn 19. apríl, sumardaginn fyrsta, er lokað í leikskólanum og einnig föstudaginn 20. apríl sem er starfsdagur.

Páskafrí og sýning

leikskoli — Wed, 04 Apr 2012 13:12:26 +0000

Um leið og við óskum ykkur gleðilegra páska langar okkur að vekja athygli ykkar á sýningu sem hefur verið sett upp í Íþróttamiðstöð Eyjafjarðarsveitar. Sýningin er afrakstur samvinnuverkefnis sem unnið var með 5. ára börnum í leikskólanum og 1. bekk Hrafnagilsskóla.

Njótið samvistanna!

Starfsfólk Krummakots

Lesa frétt

Ömmu- og afakaffi

leikskoli — Tue, 27 Mar 2012 15:56:43 +0000

Á föstudaginn 23. mars fékk leikskólinn góða gesti í heimsókn. Þá var ömmum og öfum boðið í kaffi í leikskólann. Gaman var að sjá hversu margir sáu sér fært um að mæta og gæða sér á kaffi og múffum sem börnin höfðu bakað í vikunni. Hér er að finna myndir frá ömmu- og afakaffinu.

Hrund gefur út sína fimmtu bók

admin — Tue, 20 Mar 2012 14:13:18 +0000

Nýverið kom út Bókin um Tíslu eftir Hrund Hlöðversdóttur leikskólastjóra á Krummakoti. Í kynningu á bókinni segir:

Um er að ræða námsbók í siðfræði og lífsleikni. Hún fjallar um hugsanir, tilfinningar og atvik sem upp kunna að koma hjá börnum við upphaf skólagöngu og hvernig má takast á við breytingar á jákvæðan hátt. Bókin er hugsuð fyrir kennara til að leiða samverustund með nemendum sínum þar sem rætt er um hvernig bregðast má við eða vinna með þessar tilfinningar.

Þetta er fimmta kennslubókin sem Hrund gefur út.

Sýning um hafið

leikskoli — Mon, 19 Mar 2012 15:27:59 +0000

Þriðjudaginn 13. mars var foreldrum elstu barna í Krummakoti og foreldrum nemenda í 1. bekk boðið á sýningu í bekkjarstofu 1. bekkjar. Sýningin var afrakstur þemavinnu í anda söguaðferðar sem hefur verið í gangi síðan í janúar. Vinnan var hluti af samstarfi á milli skólastiga og börnin hafa verið til skiptis í leikskólanum og grunnskólanum. Þemað að þessu sinni var hafið og margt skemmtilegt gerðist í þessari vinnu t.d. fundu börnin flöskuskeyti, bjuggu til fiska og önnur sjávardýr og hafið sjálft. Að lokum komu vatnadísir í heimsókn sem dönsuðu dansa úr hafinu og gáfu börnunum að smakka harðfisk. Hér má sjá myndir frá þemavinnunni um hafið.

Sýning í Íþróttamiðstöð

Í þessari viku verður sett upp sýning í Íþróttamiðstöð Eyjafjarðarsveitar með afrakstri þemavinnunnar um hafið.

Öskudagur

leikskoli — Fri, 24 Feb 2012 09:29:17 +0000

Á Krummakoti var haldin hátíð á öskudegi. Börnin mættu prúðbúin í öskudagsbúningum af öllum mögulegum gerðum. Deildirnar skiptust á að syngja hver fyrir aðra og fengu börnin saltstangir að launum fyrir sönginn. Mikið fjör var síðan á öskudagsballinu og spennandi var að vita hvað kæmi út úr tunnunni. Ekki var það köttur en börnin urðu mjög glöð þegar popppokar og rúsínupakkar birtust. Eftir hádegi var farið með 4 og 5 ára börnin í nokkur fyrirtæki hér í nágrenninu og sungin öskudagslög. Börnin fengu að launum smá góðgæti sem þau tóku með sér heim í lok dagsins. Hér má sjá myndir frá öskudeginum. Fleiri myndir.

Foreldrakaffi og öskudagur

leikskoli — Tue, 14 Feb 2012 14:38:20 +0000

Föstudaginn 17. febrúar bjóða leikskólabörnin foreldrum sínum í heimsókn í leikskólann á tímabilinu 14:00-16:00. Foreldrum er velkomið að koma einhvern tíma á því tímabili og setjast niður í matsalnum með barni sínu. Boðið verður upp á niðurskorið grænmeti, kaffi, mjólk og vatn.

Foreldrar eru vinsamlegast beðnir um að fylla út foreldrakönnun meðan þeir dvelja í leikskólanum en hún er hluti af okkar innra mati og skiptir máli í allri framþróun leikskólastarfsins.

Miðvikudaginn 22. febrúar er öskudagur. Þann dag er fullur leikskóladagur og börnin eru hvött til að mæta í búningi í leikskólann. Þau geta fengið andlitsmálningu í leikskólanum ef þess er óskað. Þennan dag fara börnin á milli deilda og syngja hvert fyrir annað. Slegið er upp öskudagsballi í matsalnum og kötturinn (popp) sleginn úr tunnunni. Boðið er upp á popp, saltstangir og rúsínur aukalega þennan dag.

Foreldranámskeið um Jákvæðan aga

admin — Mon, 06 Feb 2012 14:38:46 +0000

Ákveðið hefur verið að bjóða upp á foreldranámskeið um Jákvæðan aga. Námskeiðið verður opið foreldrum barna í Naustaskóla, Naustatjörn, Glerárskóla og Hrafnagilsskóla og mun kosta 1.500 kr. pr. þátttakanda. Námskeiðið verður haldið í Naustaskóla þrjú síðdegi frá kl. 17-19, þ.e. miðvikudaginn 29. febrúar, þriðjudaginn 6. mars og þriðjudaginn 13. mars. (Þetta er að hluta til upprifjun og endurtekning á námskeiði sem haldið var síðastliðinn vetur, kynning á stefnunni, ýmis gagnleg ráð fyrir uppalendur og tækifæri til að skiptast á ráðum varðandi uppeldi barnanna okkar. Síðan er ætlunin að bjóða upp á ítarlegra 7 vikna námskeið næsta haust.) Áhugasamir um þriggja kvölda námskeið framangreinda daga eru beðnir um að skrá sig með því að smella á vefslóðina hér fyrir neðan og fylla út reitina sem þá birtast. Haft verður samband við þátttakendur með tölvupósti þegar nær dregur, áhugasamir vinsamlegast skrái sig fyrir 10. febrúar.

http://www.surveymonkey.com/s/LLPQMWN

Dagur leikskólanna

leikskoli — Tue, 31 Jan 2012 09:13:30 +0000

Dagur leikskólanna er 6. febrúar að ári hverju. Að því tilefni ætlum við að þessu sinni að bjóða upp á

myndlistarsýningu á verkum leikskólabarnanna í íþróttamiðstöðinni (við Hrafnagilsskóla) 3.- 8. febrúar.

Myndirnar munu hanga á veggnum gegnt búningsklefunum og einnig í gluggum frammi í anddyri.

Gaman væri að foreldrar og aðrir gestir sæju sér fært um að gera sér ferð í íþróttamiðstöðina til að skoða listaverk barnanna.